Kinalampag ng isang kongresista ang Senado na pagtibayin na ang panukalang batas para sa pagbuo ng Virology Institute of the Philippines (VIP).
Bunsod na rin ito ng naitalang kaso ng bagong H5N1 strain ng avian flu sa mga itikan at puguan sa Bulacan at Pampanga.
Iginiit ni House Committee on Ways and Means Chairperson Joey Salceda, kailangang-kailangan ang VIP upang matiyak ang pagbangon at pag-unlad ng sektor ng agrikultura.
Ang VIP ang siyang mag-aaral sa mga posibleng sakit o virus na susulpot sa mga tao man o hayop.
Ang VIP din ang tututok sa paggawa ng bakuna at iba pang solusyon.
Tiwala naman aniya ang Mababang Kapulungan na may sapat pang panahon ang mga senador para ipasa ang VIP Bill matapos ang eleksyon 2022 o bago magtapos ang 18th Congress.
