Davao City- Daghan ang nanghinaut nga mag-host ang syudad sa Davao sa Palarong Pambansa 2019 apan wala pay pinal nga area kung asa ipahigayon ang Palaro.
Kini sumala pa sa tigpamaba sa Department of Education kun DepEd XI nga si Jenilito “Dodong” Atillo atol sa interview sa DXDC RMN Davao diin sumala niya nga kinahanglan muagi ang lokal nga gobyerno sa proseso nga mao ang bidding apan wala pay gi-abrihan nga bidding and DepEd Central Office.
Kahinumduman nga kaniadtong Palarong Pambansa ning tuiga nga gipahigayon sa Antique, daghan ang mga tarpaulin nga nakasabit sa area nga dunay nakabutang nga ang Davao ang sunod nga mag-host sa sporting activity.
Bisan pa man wala pay pormal ug pinal nga area ang Palarong Pambansa 2019, gikumpirma sa tigpamaba nga mag-host ang syudad sa Davao sa Davao Regional Athletic Association (DAVRAA) 2018.
“Ingon pa lagi nila kining DAVRAA 2018 hosting mao na ning prelude sa Palarong Pambansa 2019,” sigun ni Atillo.
RadyoMaN Renz Barbarona
