Davao City – Welcome alang kang Davao City First District Councilor Joanne Bonguyan-Quilos ang sugyot nga i-apil sa traditional sporting event ang competitive video games sama sa DOTA, League of Legends ug uban pa.
Depensa ni Quilos nga sa panahon karon, dili lang ang naandang paugnat sa kusog ang gikahiligan ug gikabuangan sa mga hamtong ug sa kabataan karon apan apil na usab ang mga video games.
Sumala sa mihawid sa komitiba sa Information Technology sa Konseho nga mas maayo usab kun makunsidera ang mga competitive video games nga walay kalainan sa traditional sporting events aron ang kabataan padayon nga mag-explore sa mga video games.
Apan sigurohon lang nga adunay regulasyon ug limitasyon sa video games uban sa panubay ug paggiya sa mga ginikanan aron dili maabuso ang competitive video games.
Maghatag usab kini og oportunidad ug kahigayonan sa mga bata nga ma-convert ngadto na sa pangita ang competitive video games.
Kabahin sa angay i-montar nga mga palisiya mao nga did-an ang mga internet café nga mupasulod og mga bata panahon sa klase aron pabilin ang motibasyon sa pagtoon sa mga bata samtang musalmot sila sa competitive video games kun maglangkub na kini sa tradional sporting events.
Hinoon, abli si Quilos sa kun kinsa ang angayang mogunit sa competitive video games sama sa papel sa Philippine Sports Commission (PSA) ilabi na diha sa pag-akseptar sa mga suhestyon sa pag-establisar ning maong mga regulasyon.
RadyoMaN Joel Viray
