Davao City – Nagpadayon ang pagpaningkamot sa pag-angkon og mga medalya sa Davao Eagles kinsa maoy atong representante sa Palarong Pambansa 2018 didto sa Vigan, Ilocos Sur.
Sa pakighinabi kang Department of Education (DEPED-XI) spokesperson Jenielito ‘Dodong’ Atillo, gibutyag niini nga aduna nay tulo ka mga bulawang medalya, lima ka silver ug duha bronze ang nasakmit sa Davao Region.
Saysay ni Atillo, nakuha ni Alearey Lumantad kagahapong adlawa sa dulang Chess sa individual category ang unang bulawang medalya ug gisundan kini sa usa pa ka bulawan sa parehong dula nga team category nga giapilan ni Alearay Lumantad ug Leanne Faith Salaodin.
Samtang ang pinakabag-ong nasakmit nga bulawang medalya nakuha ni Arnold Alizna, taga Buhangin ning syudad, kinsa atong representante sa Taekwando.
Dili man maka-improbar sa ranking ug gikunsidera nga usa ka Demonstration Sports lamang, nakasungkit sa gihapon og 8 golds, 4 silvers ug 2 bronze sa elementary level sa Dance Sports samtang 2 golds, 6 silver ug 2 bronze sa secondary level.
Dugang ni Atillo, nagpabiling taas ang morale sa Davao Eagles kinsa nagapadayon ang pag-angkon ug medalya hangtud sa katapusang gutlo sa torneyo sa paugnat sa kusog.
RadyoMaN Jason Amisola
