Ginpasigurado sang Malacanang nga handa nga mag-atubang si Pangulong Rodrigo Duterte sa posible nga impeachment complaint nga ipasaka batuk sa iya bangud sa pag-suspend kay Overall Deputy Ombudsman Melchor Arthur Carandang.
Ini ang nangin reaksyon si Presidential Spokesman Harry Roque sa ginsiling ni Sen. Antonio Trillanes nga makabig impeachable offense ang ginhimo sang Office of the President (OP) nga dagdagan sang suspensyon si Carandang bangud may yara sang jurisprudence ang Korte Suprema sadtong 2014 nga nagpabor sa apelar ni Deputy Ombudsman Emelio Gonzales sang ginsipa ini sa pwesto ni anay Pangulong Noynoy Aquino.
Suno kay Roque, nagapanindugan ang Malacanang nga may kinamatarong ang OP nga papanaugan ang Deputy Ombudsman bangud indi ini isa ka impeachable official kaangay sang Ombudsman.
Dugang pa ni Roque, ginahangkat nila si Trillanes nga magpasaka sang impeachment complaint batuk kay Duterte kag atubangon ini sang Malacanang sa Kongreso.
Nagpanindugan man si Roque nga may gray area ang Supreme Court decision sadtong 2014 nga nagadeklarar nga unconstitutional ang Section 8 Paragraph 2 sang Republic Act 6770 (Ombudsman Charter) nga nagasiling nga asta sa Special Prosecutor ang sakop sang pangulo kag wala nalakip diri ang Ombudsman kag Deputy Ombudsman.
Matandaan nga si Carandang ang ginsuspend sang Malacanang bangud sa kaso nga grave misconduct kag grave dishonesty bangud sa ginapatihan pagpaguwa sang bank transactions ni Pangulong Duterte nga gingamit ni Sen. Trillanes sa iya pagbulgar sang ginapatihan tago nga kwarta sang pamilya Duterte. *rcsg*
For more news updates like our official Facebook page: www.facebook.com/ifmbacolod943
