Davao City – Sa mata sa mga anti-communists, mamahimong kapildihan sa katawhan ang hukom ni Malolos Bulacan Regional Trial Court Judge Alexander Tamayo batok kang Ret. Army Major General Jovito Palparan uban sa duha ka sundalo sa kasong kidnapping ug serious illegal detention nga gipasaka sa mga ginikanan sa duha ka estudyante sa University of the Philippines pipila na ka tuig na ang nakalabay.
Apan alang kang Ateneo De Davao University (ADDU) College of Law professor Atty. Arnold Abejaron, dili pa ngitngit ang kaugmaon ni Palparan tungod kay ang hukom sa korte sa Malolos dili pa pinal ug puwede pa kini i-apelar sa Court of Appeals ug Korte Suprema aron balihon or i-reverse ang unang desisyon sa lower court.
Gipasabot ni Abejaron nga gikan sa adlaw sa desisyon sa korte ang kampo ni Palparan gihatagan og 15 diyas aron i-apelar ngadto sa appellate court ang hukom ug kung mapakyas sa unang lakang, aduna pay Korte Suprema nga puwede pa niyang kadaganan.
Wala na gikwestiyon ni Abejaron ang gigamit nga basehan ni Tamayo tungod ubos sa balaod sa korte gikunsidera nga ebidensiya ang testimonya sa testigo sama sa gipresentar sa prosekusyon.
Ang sipyat lang sa kampo ni Palparan kay wala gipamugos sa abogado niini ang rebuttal aron kontrahon ug pahuyangon unta ang testimonya sa testigo sa prosekusyon diin daku unta og tsansa nga mapaboran sa korte si Palparan.
Apan bisan paman niini, giingon ni Abejaron nga dili gihapon angay sirad-an sa kampo ni Palparan ang pultahan sa kahigayonan kay naa pa may nabiling legal remedy sa paglaum pinaagi ani mausab ang desisyon.
Samtang naka-ung ong ang pag-apelar sa kaso, gidasig sa abogado ang mga sundalo nga dili ma-demoralize gumikan sa nadangatan ni Palparan karon taliwala sa iyang pakigbatok sa CPP-NPA-NDF ug kadaugan kontra insurhensiya sa nasud dihang aktibo pa kini sa armadong kusog sa Pilipinas.
Human miretiro si Palparan gikan sa serbisyo, nanilbihan kini nga kongresista sa usa ka termino ug mibatikos sa kanhi Davao City Mayor ug karon Pres. Rodrigo Duterte taliwala sa piniliay kontra kang kanhi House Speaker Prospero ‘Boy’ Nograles pila na ka tuig ang nakalabay.
RadyoMaN Joel Viray
