Davao City – Gikumpirma mismo sa Chief Statistical Specialist sa Philippine Statistics Authority kun PSA Davao nga si Randolph Gales nga dunay ginahimong census ang ilang ahensya.
Nagpadayon sa karon ang duha ka mga proyekto sa PSA, ang (1) geo-tagging project ug ang (2) listing of farm households.
Gipahibalo ni Gales ngadto sa publiko nga aron masayran kung lehitimo ba nga mga personahe sa PSA ang nagahimo sa interviews sa nagkadaiyang lugar, kinahanglang adunay ikapakitang ID ug authorization to conduct a survey gikan sa PSA diin siya mismo ang mipirma. Inay daghang mga printed forms, *tablet* na usab ang dala sa mga nagahimo sa ilang census. Naga-courtesy call usab ngadto sa barangay council ang mga interviewers una sila mohimo sa ilang pagbisita sa matag panimalay. Kung buot pa gayud sa mga residente nga makaseguro, mamahimong motawag sa hotline sa Philippine Statistics Authority sa mga numerong(082) 224-2975 o sa (082) 222-1432 aron i-check ang mga nagpailang taga-PSA.
Nagpahimangno usab si Gales nga dunay mga dautang elemento nga posibleng mogamit sa ilang ahensiya alang sa mga binuang. Busa pahinumdom niya nga bisan pa man og dunay ikapakitang mga ID ug papeles, angay nga bantayan sa gihapon ang linya sa mga pangutana nga wala na mahaom sa tumong sa gihimong survey.
Nasayran nga dunay pipila ka mga panimalay nga nakawatan human na-interview sa mga nagpailang personahe sa PSA. Mao kini ang hinungdan kung nganong nagpaabot sa ilang kabalaka ang pipila ka mga residente sa may Deca Homes Tacunan ning siyudad sa programang Serbisyong Straight to The Point.
RadyoMaN Misel Miral
