Roxas City, Capiz – Pormal na nga gin- endorso kahapon nga adlaw sa ginpatigayon nga pagtilipon ang tanan nga mga kandidato sang PDP-LABAN Party sa napulo ka mga banwa sa segundo distrito sang Capiz.
Yara ang presensya nanday PDP- Laban Provincial Chairman kag Tapaz Mayor Roberto Palomar; Capiz Governor Nonoy Evan Contreras; Mambusao Mayor Leodegario Labao Jr. nga magapadalagan para sa pagka-congressman sa 2nd district kag former Governor Victor Tanco Sr. nga magapapili sa pagka-bise gobernador sang probinsya.
Kalakip sa linyada sang PDP-Laban sa pagka-board member sa 2nd district amo sanday Jeffrey Layo, Ferdinand Baguio, Nerisa San Felix, Julio Gustilo Jr. kag Aldwin Cruz-am.
Gin-endorso ang mga kandidato sang banwa sang Tapaz sa pagpamuno ni incumbent Mayor Roberto Palomar kag Vice Mayor Maria Fe Gardose.
Sa Mambusao, mayoralty candidate si Luzviminda Labao samtang mangin ka- tandem sini si incumbent Vice Mayor Fred Leal para sa re-election.
Ginpakilala man bilang kandidato sa pagka-alkalde sa banwa snag Cuartero amu si Vice Mayor Roger Flores kag Mayor Tito Mayo sa pagka-bise alkalde. Sanday Flores kag Mayo ang lunsay last-termer na kabangdanan nga magabayluhanay sa pagpapili sa masunod nga eleksyon.
Kalakip man sa mga gin-endorso ang mayoralty candidate sa banwa sang Dumarao nga si incumbent Vice Mayor Leslie Warren Benjamin kag ka-tandem sini nga si Board Member JR Tanco sa pagka-bise alkalde.
Si Engr Jimbo Nonong Barruela ang pambato sang PDP-Laban Party sa banwa sang Dao sa pagka-alkalde samtang mangin ka-tandem sini amo si Panoy Daños.
Gin-endorso man bilang mayoralty candidate si last termer Vice Mayor Clemente ‘Budong’ Firmalino sang Dumalag sa diin mangin ka-tandem sini nga magapadalagan sa pagka- bise alkalde amu si Punong Barangay Basty Salazar sang Barangay Poblacion, Dumalag, Capiz.
Si Jamindan Vice Mayor Ildy Cusay ang magapapili man sa pagka-alkalde kaupod sini si SB Member Leila Mae Garcia Leonor nga magapapili sa pagka-vice mayor.
Kalakip man nga nagtambong amu sanday Vice Mayor Stephen Alayon nga nag-file sang iya certificate of candidacy(COC) sa pagka-alkalde samtang si SB member Tomas Lagulay ang magapapili sa pagka-bise-alkalde.
Sa banwa sang Sapian, mangin pambato sang PDP-Laban Party sa pagka- alkalde amo si SB Member Julius Orillos kag SB Member Marvin Cordero sa pagka-vice mayor.
Samtang sa banwa sang Ivisan, magapapili sa pagka-alkalde si SB Member Azucena Chapman kag SB Member Jerose Pisueña sa pagka-bise alkalde.
Yara man kahapon nga adlaw ang presensya sang tanan nga linyada sa mga kabanwahanan para sa Sangguniang Bayan Member.
