Pamilya ginahulat pa kon bala desidido sa pagpasaka sang kaso sa manghod nga nakapatay sa iya magulang

KABANKALAN CITY, NEGROS OCCIDENTAL – Ginahulat sa karon ang desisyon sang pamilya kon bala pasakaan sang kaso ang isa ka manghod nga nakabuno patay sa iya magulang sadtong Sabado sang gab-i (Agosto 18) sa Brgy. Locotan, ciudad sang Kabankalan.

Ang biktima nga si Alfredo Sondia, 30 anyos ang edad ang wala nakaluwas kag napatay gid matapos gin-alegar nga ini ang ginbuno sang iya manghod nga si Raffy Sondia, 24 anyos ang edad, lunsay pumuluyo sang Sitio Luwag, Brgy. Locotan.

Natabo ang insidente mga las 11:30 sang gab-i sadtong Sabado sa amo nga lugar kon diin naglalisay ang suspek kag biktima bangud gid lamang sang papeles sa PhilHealth.


Suno sa imbestigasyon sang Kabankalan City Police Station, naglalisay ang mag-utod bangud sa ginpa-photo copy nga membership data record sang PhilHealth nga isa sa requirement sa ila gina-proseso sa ciudad.

Ginpahaag nga bangud sang mga malain nga tinaga nga ginbuy-an sang manghod, ini siya ang ginsumbag sang iya magulang.

Apang, lipud sa ihibalo sang biktima nga may bitbit gali nga kutsilyo ang iya manghod kon diin ini siya ang ginbuno kag naigo gid sa dughan nga amo ang gintunaan sang iya kamatayon./dyHB BACOLOD

Facebook Comments