Gibarugan sa magulang nga si Reynaldo Bayansao nga walay kasayoran ang iyang manghud nga naila sa tinuod nga pangalang si Renato “Empoy” Bayansao sa paglugos patay kang Architect Vlanche Marie Bragas sa rason nga niadtong higayona nahitabo ang krimen nagkauban matud pa sila og dula og basketball sa gym ug bandang 10:00 gabii naka-uli na sila sa ilang balay sa Purok 20, Barangay Calinan Poblacion.
Giingon ni Reynaldo nga wa’y lisensiya ug ombak gani dili usab kabalo mag-drive ang iyang manghud nga si Empoy diin ang trabaho lang niini mao ang pagka- tour guide sa mga manakaay sa Mount Apo.
Una nang gibutyag ni NBI XI Director Atty.Archie Albao nga ang ilang dinakpan sa buy-bust operation niadtong Sabado may pagka-pamayhon sa usa sa mga Person of Interest sa Bragas Rape Slay Case.
Hinuon, gisulti sa opisyal nga hangtud walay mutumaw nga testigo dili una nila mapasakaan og kaso may kalambigitan sa paglugos patay sa dalagang architect.
Gibutyag ni Barangay Calinan Poblacion Kapitan Ursicio Ungab nga walay dautang record sa barangay si Empoy bisan sa dugay nilang pagpuyo sa Calinan area.
Gipalanog usab sa mga silingan nga usa ka buotang tawo ug residente sa ilang dapit si Empoy busa dili sila katuo nga mabuhat niya ang brutal nga pagpatay kang Bragas kinsa nalubong na sa nakalabay’ng semana.
Hinoon, gipaningkamotan sa news team nga makuhaan og reaction si Director Albao labot sa pamahayag sa Pamilya Empoy.
RadyoMaN Joel Viray
