Sa pakighinabi sa DXDC RMN Davao sa manghud niining si Lilian Orillo Gomez, iyang gikumpirmang nakita na iyahang maguwang nga wala na’y kinabuhi niadtong November 25, 2023 sa hapon sa may Purok Pag-Asa, Barangay New Clarin, Bansalan.
Kahinumdoman nga niadtong November 24, una nang nag-post ang pamilya sa biktima nga na-missing si Gomez human maanod sa baha samtang pauli na unta sa ilahang panimalay.
Sa impormasyon gikan sa Bansalan Municipal Police Station (MPS), nasayrang nagmaneho ang biktima og motorsiklo sakay ang iyahang backrider nga si Bobong Panerio, nisuway kini og tabok sa sapa ug tungod sa naglain nga panahon ug kakusog sa bul-og sa tubig, naanod ang motor lakip na si Gomez nga mao’y hinungdan sa iyang hinanaling kamatayon samtang si Panerio, anaa na sa luwas nga kahimtang.
Subay niini, nagpaabot og pahasubo ang Bansalan MPS sa pamilya sa biktima ug sila nagpahimangno nga kanunay mag-igmat ug perming iprayoridad ang kaluwasan ilabi na kung naglain ang kondisyon sa panahon.
RadyoMaN Ivy Parido
