General Santos City—Planong mupasaka ug kaso sa usa ka Ginang batok sa mga security guard sa KCC mall dinhi sa Gensan tungod matud pa sa pagpakaulaw nila ngadto sa iyang ig-agaw nga nagpaila lang sa pangalang Dodong.
Sumala ni alyas Bebing asawa sa usa ka retired police sa Gensan naulawan ang iyang ig-agaw human kining gidakop sa mga personahe sa KCC human napasumanginlang nangawat sulod sa mall. Sumala sa ginang nga nakaabot na sa atubangan sa socoteco II ang iyang ig-agaw ug didto na kini gidakop sa mga sekyu sa maong mall.
Gihingusgan ni Ginang Bebing nga wala gyud mangawat ang iyang ig-agaw nga si Dodong kay gani wala may nakuhang ebidensya o mga butang nga kinawat sa iyang posisyon. Aminado hinuon ang ginang nga misulod sa maong mall ang iyang ig-agaw apan wala man kini nakahimo sa pagpangawat.
Usa sa gikasakit sa ginang mao ang pag-hold sa iyang ig-agaw ug halos tunga sa adlaw bisan tataw nga walay ebidensya nga nakuha kaniya ingon man ang pagdakop kaniya bisan layo na sa maong gambalay. (Jordan Britos)
