Sa labing unang higayon gibuak na sa pamilyang Ungab ang ilang pagpakahilom labot sa pag-ambush ug pagpatay ni Atty. Jonah John Ungab.
Ang asawa sa abogado nga si Pearl niawhag sa mga nakasaksi sa krimen nga mopatim-aw ug motabang sa imbistigasyon sa kapolisan aron matumbok ang mga nagpaluyo sa krimen .
Emosyonal usab nga gisaysay ni Pearl ang nahitabo nga pag-ambush sa iyang bana niadtong Lunes , samtang nigawas na sila sa compound sa Qimonda I.T. Center diin nahimutang ang Cebu City Hall of Justice .
Lakip sa niatubang sa ilang gipatawag nga press conference ang inahan ni Atty. Ungab ug ang igsoon niini nga si Jonald .
Si Jonald nihatag usab ug situwasyon sa politika sa Ronda nga angayan usab nga tan-awon sa kapolisan labot sa imbistigasyon sa krimen .
Ang Task Force Ungab nitutok karon ug tulo ka anggulo sa krimen nga mao ang iyang trabaho isip abogado , politika ug personal nga motibo .
Girespeto usab sa pamilya ni Ungab ang pahayag ni kanhi Albuera Police Station Chief Inspector Jovie Espenido nga nalipay kini sa nahitabo sa abogado nga iyang gipasanginlan nga protektor ug partner sa drug lord nga si Kerwin Espinosa .
Dalhon ang patay`ng lawas ni Ungab karong Sabado sa lungsod sa Ronda diin siya bise mayor , aron hayaon kini ug usa ka gabii sa simbahan sa lungsod sa di pa ang lubong karong Dominggo .
