Pamilya sa landscaper nga gipusil patay nagsinggit ug hustisya

26

Hustisya ang singgit sa mga kabanay ni Arnelo Magbanua, 31 anyos nga taga Ardonia Street, Barangay Lagao, Gensan, kansa gipusil patay sa wala pa mailhing suspek alas 6:10 ang takna sa gabie sa may Lagao-Baluan Road kung asa damay pa ang igsuon niini nga si Analyn Wadi kansa naigo sa iyang kamot nga bahin.

Sumala sa igsuon sa mga biktima nga si Mary Grace, padulong unta sa Barangay Buayan ang iyang mga igsuon apan pag-abot sa lugar sila gisundan sa duha ka mga suspek dayon gipabuthan makadaghang higayon.


Igo sa iyang ulo ug uban pang parti sa lawas ang biktimang si Magbanua nga hinungdan sa iyang kamatayon, samtang si Analyn nakaangkon ug samad sa iyang kamot nga bahin kansa daling gidala sa ospital human sa insidenti.

Dugang pagbutyag ni Mary Grace nga walay kalaban ang iyang namatay nga magulang ug gani focus matud pa kini sa iyang trabaho isip Landscaper.
Sa karon hangyo sa pamilya ngadto sa kapulisan nga tagaan ug hustisya ang kamatayon.

Ilang panghinaot nga madakpan ang suspek aron nga mabayran niini ang salaod nga iyang gihimo.

Padayon pa ang ginahimong imbistigasyon sa Police Station 3 kalabutan sa pagpamusil patay sa biktimang si Magbanua.

Sumala ni Police Major Benhur Catcatan, hepe sa Police Station 3 nga sa karon ginatan-aw pa nila kung unsang mga anggulo sa pagpatay sa biktima.

Gikumperma sa opisyal nga si Arnelo Magbanua, igsuon sa gialigarang hold-upper nga napatay sa kapulisan atol sa operasyon pipila na ka bulan ang nakalabay.

Facebook Comments

From Advertisers