Pamilya sa magsuong PWD nga namatay sa sunog nangayo’g tabang pinansyal

Davao City – Maglisud pa og dawat ang amahan nga si Eliseo Romero sa gidangatan sa duha niya ka anak, parehong person with disability (PWD) human naapil og kasunog sa ilang balay niadtong Lunes alas 6:00 sa gabii Enero 8, 2024 sa Purok Kaunlaran, Brgy. Saloy, Calinan Dist., Davao City.

Sa pakighinabi sa DXDC RMN Davao kang Eliseo Capunong Romero, amahan sa mga biktima gisulti niya, nagkinahanglan sila og pinansyal nga tabang alang sa paghiluna sa duha niya ka anak.

“Kinsa man nakadungog og malumong kasing kasing mangayo ko gamay hinabang wala wala gyod ko”, Sulti sa amahan.

Segun ni Romero, wala siya nagdahum nga mahitabo sa iyang duha ka anak nga sila alias Lex, 14 anyos ug alias Loy, 13 anyos kinsa namatay sa sunog.

Gipasabot sa amahan, wala siya sa ilang balay niadtong higayona tungod nitabang usab siya sa pagpahiluna sa iyang igsuon nga bag-o ra usab nga namatay.

Gitunolan dayon sa Team sa DXDC RMN Davao og pinansyal nga tabang ang pamilya aron nga adunay magamit sa paghiluna sa duha ka biktima.

Nasabutan sa pamilya nga karong adlawa Enero 10, 2024, ilubong ang duha ka biktima sa Barangay Saloy, Calinan District, dakbayan sa Davao.

RadyoMaN Don Pulayao