Nagpahungaw sa iyang kahiubos sa DXDC RMN Davao si Ex. Kagawad Jenelyn Martin, iyaan sa usa mga biktima nga si Glendellle Joy Villocino gumikan kay ilang namatikdan nga wala magpakabana sa mga nagbuy-od nga mga batan-on ang tagdumala sa inland resort human kini manga-igo sa kilat atol sa pagbunok sa ulan.
Sumala ni Ex. Kag Martin nga ilang naabtan nga nangahumod pa ang mga biktima ug walay mga panimuot human kini mangalagpot gikan sa purok nga ilang gipasilungan tungod sa pagka igo sa kilat.
Matud sa iyaan nga wala man lay gihimo nga lakang ang tagdumala sa inland resort sa dihang nakita na niini ang tabangunon nga kahimtang sa mga biktima bisan nalang ang pag-aswat balik sa purok aron nga dili maulanan ang mga batan-on.
Nagakanayon ang iyaan nga mahimo man unta sa tagdumala nga manduan ang ilang mga personahi aron dayungan ang mga biktima padulong sa ubos nga bahin aron mas dali nalang sa mga rescuers ang pagdala sa mga nakilatan sa balay tamabalanan.
Gidugang sa iyaan nga mahimo kaayo sa tagdumala ang paghimo ug mga lakang aron masalbar ang mga biktima tungod kay dili man kadto disgrasya sa kadalanan nga nagkinahanglan pa og traffic investigator.
Gibutyag ni Martin nga unahon una sa mga tagtungod ang paglubong sa lima ka mga biktima human magsabot sila aron sa sunod nga lakang mao ang pagpasaka og kaso batok sa tag-iya sa Camp Madeg’ger.
Kahinumduman nga dead on arrival sa Davao del Sur Provincial Hospital ang mga biktima nga naigo sa kilat nga sila si Glendelle Joy Villocino, 17 anyos, Valirie Asutilla, 23 anyos, Jhon Gabriel Hersania, 15 anyos, Geramie Cartagena, 18 anyos, Jonmel Galicia, 19 anyos, ug ang survivor nga si Clarence Kate Chatto, 21 anyos.
RadyoMaN Joel Viray
