Sa interview sa DXDC RMN Davao kang Maria Lourdes Saldua, inahan ni Justine Mae, ilang gikadismaya ang gipamahayag ni DCPO Director Police Colonel Alberto Lupaz nga basin nagbuhat-buhat ra sila og istorya tungod kay wala dayon nila kini gipa-blotter sa pulis human na-missing ang anak niadtong Agosto 29, 2023.
Apan, giklaro sa inahan nga misalig sila sa giingon sa amo nga pulis nga siya ang mupaimbestiga sa pagkawala ni Justine Mae, apan midagan nalang ang pila ka semana, wala gihapoy resulta. Kini usab ang rason kung nganong ilahang gipaabot ang kaso kang Senador Raffy Tulfo aron kini gilayong maaksyonan.
“Sa tinuod lang, kadto amoang nadungog nga nagtumo-tumo mi (sa pagkawala ni Justine), mura’g makaingon mi nga alanganin gyud. Dili gyud mi makaingon nga solbaron kaha nila ning kaso ni Justine? Kay siya mismo ang miistorya gud ana. Diba siya ang (director) sa DCPO? Nganong tumo-tumo man amoa? Dili mi boang nga ginikanan nga maghimo-himo mi’g istorya. Hangtud karon ba wala si Justine,” sulti sa inahan.
Matud sa inahan nga gisulti sa naga-imbestiga nga wala pay sakto o igong ebidensya aron nga maduso ang kaso batok kang Uyanguren, rason nga pangutana sa inahan kung unsa pa nga ebidensya ang kinahanglan, luyo sa kwestyonableng conversation sa cellphone nga ilang nakita ayha na-missing si Justine Mae.
RadyoMaN Kirby Manzon
