Sa interbyu sa DXDC RMN Davao kang Police Corporal Arnel Cañetan, ang Traffic Investigator sa San Pedro Police Station, naila ang namatay nga sila Damian Bana-ay Turannueva, driver sa Suzuki raider MC, residente sa Laak Poblacion, Davao de Oro ug Ruel Gumapon Banay, hingkod ang edad, backrider, residente sa nasampit nga lugar.
Sa inisyal nga imbestigasyon ni Cañetan, ang motorsiklo gikan sa Gen. Luna Street paingon sa Central Bank sa dihang nawad-an kini og kontrol ug nibangga sa likod nga bahin sa Isuzu truck. Tungod sa kusog sa impact ang motorsiklo natumba sa sementadong karsada, samtang ang driver ug pasahero nakaangkon og daghang samad ug bun-og sa kalawasan nga miresulta sa hinanaling kamatayon.
Ang kapulisan sa San Pedro naghulat pa og tubag sa tag-iya sa truck kung makig-areglo sa pamilya sa mga namatay.
RadyoMaN Don Pulayao
