Cuartero, Capiz – Indi na interesado pa nga magpasaka sang kaso sa mga suspek ang pamilya sang napatay nga persona bangud sa kastigo sa Barangay Bun-od, Cuartero, Capiz.
Ini ang ginkumpirmar ni Kapitan Roberto Francisco matapos ang settlement sa tunga sang magtimbang nga bahin sa presensya sang mga barangay officials.
Suno kay Kapitan Roberto Francisco, nahisugtan sang mga ini nga pagasabton na lamang sang mga suspek ang kalagastuhanan sa pagpalubong sa biktima nga si Juan Espiriano Jr., 33-anyos nga residente sang nasambitan nga barangay.
Mahibaluan nga ginkilala ang mga suspek nga nagpangkastigo nga amu sanday Neil Espiriano 18-anyos; Christian Herosa, 19-anyos kag Edjay Bon Mayo Golviogo, 18-anyos.
Suno kay Police Staff Sargeant Francis Dordas sang Cuartero PNP, una nga nakit-an sang mga suspek ang biktima nga nagapungko sa bangko nga hubog kag wala sang anuman nga ila ginpalapitan kag ginsipa.
Wala pa makuntento ang mga suspek kag ginbalikan pa gid sang mga ini ang biktima kag liwat nga ginkastigo.
Gindala ini sa Dao District Hospital apang gindeklarar nga dead-on-arrival sang doktor.
Samtang, nagpadulong naman sa Cuartero MPS ang pamilya sang napatay nga si Juan Espiriano Jr. agud nga mag-file sang affidavit-of-non interest sa pagpasaka sang kaso kontra sa mga suspek.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
