Cuartero, Capiz – Nagalab-ot na sa lima ka tuig nga wala makapauli sa iya pamilya ang OFW nga si Jenylyn Pimentel Maxian, 38-anyos sang Brgy. Agdahon, Cuartero, Capiz nga gin-alegar ginbawian sang kabuhi sa pungsod Kuwait.
Ginpahayag ni Mr. Rogelio Maxian, bana sang biktima nga tuig 2013 pa sang nagbiya ang iya asawa agud nga magtrabaho bilang domestic helper sa amo nga pungsod apang makaligad ang duha ka tuig, nakabaton sila sang impormasyon nga naglayas ini sa iya employer bangud wala ginaswelduhan sang husto kag ginamaltrato. Bangud sini wala natapos ni Jenelyn ang iya kontrata sa employer kag sa agency.
Suno pa kay Mr. Maxian, posible nga nagpanago sa mga otoridad sa Kuwait si Jenelyn kag masami nga nagatinir kag nagasaylo-saylo na lamang sa mga abyan sini nga OFW. Ginpahayag dugang sang bana nga ang katapusan nga komunikasyon ni Jenelyn sa ila nga bata sa Metro Manila sadtong una pa nga semana sang Oktubre. Wala man nakasugid si Jenelyn sang iya matuod nga kahimtangan sa pungsod Kuwait kag nakibot na gid lamang sila sang balita nga napatay na ini sang nakaligad nga Oktubre 20.
Ginkumpirmar man sini nga nagtawag na sa ila ang OWWA kag natalana nga magpadulong sa Brgy. Agdahon anu man nga adlaw sa sini nga semana agud makig-angut sa iya. Emosyonal nga naga-apelar ini sang bulig sa mga natungdan nga ahensya sang gobyerno agud mapauli ang bangkay sang iya asawa.
Suno kay Mr. Rogelio Maxian, handum gid sang iya asawa nga magtrabaho sa luwas sang pungsod agud makatibawas sa kapigaduhon, mapa-eskwela ang ila duha ka mga kabataan rasun nga ginprenda sini ang ila gamay nga uma, apang gindimalas si Jenelyn. Palamangkutanon sa gihapon sang pamilya kon anu ang matuod nga natabo sa ila himata sa pungsod Kuwait.
Sa madumduman nga naglapta sa social media ang balita nga napatay ang OFW nga si Jenylyn Pimentel Maxian matapos ginpost sang isa man ka pinay agud mapalab-ot sa natungdan nga pamilya.
