Pamilya ug pagsalig sa Ginoo tinubdan sa kalipay

10

Davao City – Dili hingpit ang kalipay sa kadaghanang mga Pinoy kay mas gihambin pa man gihapon ang mga problema sa kinabuhi ikumpara sa pipila ka hinungdan sa pagmaya.

Giingon ni Inorisa Elanto, Mindanao Migrants Center for Empowering Action Executive Director nga dili holistic ang kalipay sa mga Pinoy kay nagpabilin pa man ang pipila ka dagku nga suliran nga maoy kawsa aron dili magmaya sa kinabuhi.

Buot sayron ni Elanto ang gipanukaran sa survey result sa Social Weather Station (SWS) kung asa migawas nga 94% sa mga Pinoy nagkanayon nga sila malipayon luyo sa paghapak sa unos sa mga suliran sa kinabuhi.

Alang ni Elanto, ang tinubdan sa kalipay mao ang maayong panglawas ug seguridad sa panginabuhian ug himsog nga relasyon sa kaubanan sa trabaho nga sagad makita sa mga anaa sa saktong estado sa kinabuhi.

Ang tinuod nga kalipay dili makita sa bahandi nga maoy gusto angkonon sa kadaghanan aron masinati ang katagbawan sama sa pagpaningkamot sa mga adunahan karon.

Segun ni Elanto, ang kalipay makaplagan lamang sa importansiya sa pamilya ug wala sa bahandi busa kun bisan og kasarangan lang ang kinabuhi apan adunahan sa gugma sa banay nan gipuno na kita sa kalipay niana.

Si Elanto, nagmaymay sa tanan nga dili padak-on ang pagtutok sa suliran aron sa ingon dili hingpit mapildi sa kinabuhi ug dili matapos ang pangandoy sa pagkab-ot sa kalipay sa kinabuhi pinaagi sa pagsandig ang tanang kapait dinha sa Dios.

RadyoMaN Joel Viray

Facebook Comments