Pamilyang Corsino maglisod og dawat sa kamatayon ni Police Corporal Mark Anthony Corsino

Davao City – Dili makadawat ang pamilyang Corsino sa matang sa pagpatay kang Police Corporal Mark Anthony Corsino, human gipatay sa IP Leader nga si Benao Landas, kinsa napatay usab sa kapulisan sa kasamok sa Purok 4, Barangay Lacson, Calinan District, syudad sa Davao, niadtong July 26, 2023.

Grabing kaguol ang gibati ni Police Master Sergeant Sharon Corsino, ang gidangatan sa iyang manghod nga si Police Corporal Corsino, gikan sa kamot ni Landas.

Matud ni Sharon, pag-abot nila sa iyang laing igsoong pulis sa crime scene, ila nalang nakita nga gitabonan na og dahon sa saging, ang patay’ng lawas sa iyang manghod tapad ni Police Master Sergeant Tito Lague. Sumala ni Sharon, naglisod sila og sulti sa ilang inahan mahitungod sa brutal nga kamatayon sa ilang igsoon.

Segun ni Sharon, usa ka agresibong pulis ang iyang manghod kay kung adunay mga panghitabo, mag-una gayud kini sa pagresponde ug gani hapit usab kini mapatay sa gang member sa miaging katuigan.

Luyo sa kasakit nga gibati sa Pamilyang Corsino, andam gihapon sila nga i-agi sa balaud ang pagkab-ot sa hustisya sa kamatayon ni Mark Anthony, pinaagi sa pagpasaka og kaso batok kang Rico Masacay, kinsa anaa na karon sa kustodiya sa DCPO.

RadyoMaN Joel Viray