Dapitan City-Nangita karon ug tukmang tubag/hustisya ang pamilyang Gomera may kalabot sa ilang yuta nga gitukoran karon ug dakbalay sa taga Bureau of Fisheries and Aquatic Resources (BFAR) nga proyekto sa National Fisheries Research and Development Institute (NFRDI), diha sa may barangay San Pedro, Dapitan City.
Butyag pa ni Demosthenes C. Gomera, kinsa mao karon ang galihok sa ilang yuta nga quetionable ang pagtukod sa maong dakbalay tungod kay walay pagtugot gikan kanila ug wala sila mihatag ug permiso sa dihang gisugdan kana nga proyekto, nahibulong nalang sila nga adunay na diay gibutang nga proyekto.
Personal gayud niyang giduol ang usa sa mga personahe matod pa sa BFAR para makig storya may kalabot sa maong proyekto apan, gipangitaan siya ug titulo sa yuta para sa pagpamatuod nga sila gayud ang tag-iya, apan wala siya’y mapakita kay hangtod karon ila pang giproseso matod pa ang pagpatitulo sa ilang yuta.
Bugtong deklarasyon lamang ang ilang gihawiran sa pagkakaron, nga maoy lig-ong ebidensya sa pagpamatuod nga sila ang tinuod nga tag-iya ug dili basta-basta makuha ni bisan kinsa saysay pa ni Gomera.
Ila pud kining gisulay pagduol sa mayor sa Dapitan para matin-awan sila sa maong panghitabo, pero hangtod karon wala pa gayud sila nagka atubang ni Mayor Nene Jalosjos, tungod sa ka bisi ug mga kakulian.
Kampante gayud sila nga sa dili madugay manubag gayud ang mga tawo nga nagpaluyo niini kung ngano wala sila giila, nga sila man ang unang naka posisyon sa maong luna ug kini ang giangkon ni Demosthenes Gomera nga moabot sa 7,665m2 (0.7665ha). ang utlanan sa maong yuta mao ang national highway, pulauan river, felix Villadolid, ug Amancio Balingit.
Base usab sa certification gikan sa Office of the city Assessor sa dakbayan sa Dapitan, nakapangalan kini nga luna ngadto kang Rev. Cerilo Gomera. Nahatagan pud kini sila ug certification niadtong Abril 3, 1978 nga si Rev. Gomera ang naka posisyon.
Hinuon gibutyag pa ni Demosthenes C. Gomera, nga andam sila bisan pag mag abot sila sa korte para mo lutaw ang tinuod.
Kung bayran usab sila sa saktong kantidad bugti sa pag gamit sa ilang yuta sa gobyerno, andam usab sila nga modawat, basta kay magsunod sa saktong presyo, dugang pa ni Gomera.
