Davao City – Gipresenta na kaganinang butang sa Police Regional Office 11 ang usa ka pamilyang sakop sa teroristang CPP-NPA-NDF kinsa boluntaryo mitahan sa Davao City Police Office kagahapong adlawa.
Mismo si PRO 11 Director Police Chief Superintendent Marcelo Morales ang midawat sa tulo ka miyembro sa pamilya nga sakop sa CPP-NPA-NDF human gipresenta sa DCPO ganinang 8:00 sa buntag.
Bitbit matud pa ni Ka Jessie ug sa iyang asawa ug anak ang homemade ingram sub machine gun nga dunay 50 rounds nga bala, 9mm pistol ug walo ka M203 nga bala, duha ka fragmentation hand grenade ug duha ka improvised explosive device.
Lakbit saysay ni Ka Jessie sa iyang pag-atubang sa kadagkoang opisyal sa rehiyonal nga buhatan sa kapulisan nga apil siya sa mga nagsulong ug nagsunog sa Lapanday sa may Mandug sa miaging tuig.
Wala na sab gisulti pa ang rason nganong nakahukom silang magpamilya nga mubalik sa sabakan sa gobyerno diin matud ni Morales makadawat og tabang gikan sa kagamhanan ang nasangpit nga pamilya aron makasugod sila sa ilang panginabuhian.
Sa karon, anaa pa sa kustodiya sa DCPO ang tulo ka surrenderees.
RadyoMaN Joel Viray
