Sa interview sa DXDC RMN Davao kang Maria Lourdes Saldua, inahan ni Justine Mae, nagpasalamat siya sa DXDC tungod kay napahibalo kanila nga napasakahan na og administrative case si Police Major Michael Uyanguren, ang amo sa iyang anak nga Justine Mae nga maoy gikwestyon ug alegasyong dunay kalabutan human nga na-missing ang house helper.
“Dako na kaayo ko’g pasalamat sa inyuha (sa DXDC) kay nawad-an na man gyud mi’g (paglaum). Unta dili pud mo mawad-a’g paglaum nga mo-update sa ilaha (sa kapulisan). Sa inyuha nalang mi manguha’g impormasyon kay ang mga pulis man gud dili na man gud ma-contact,” sulti sa inahan.
Nanghinaut ang inahan nga magpadayon ang kaso aron mahatagan og hustisya ang pagka-missing sa iyang anak nga mag-lima ka bulan na, apan nagpabiling blangko ang tanan kung asa kini nagtago o unsa ang tinuod nga nahitabo.
Matud ni DCPO Director Police Colonel Alberto Lupaz, kinahanglang atubangon ni Uyanguren ang iyang kaso ug kung siya inosente, pamatud-an niya nga sayop ang mga alegasyon batok kaniya.
RadyoMaN Kirby Manzon
