Davao City – Gidepensahan ni Davao City 1st District Councilor Nilo Abellera Jr. si Pres. Rodrigo Duterte gikan sa mga pamahayag niini batok sa Dios nga mipainit sa mga kritiko karong panahona.
Segun ni Abellera nga dili pagyaga-yaga sa Dios ang pamahayag ni Pangulong Duterte inay intepretasyon niya kadto sa mga pulong nga mabasa sa bibliya.
Busa tataw nga dili intention sa pangulo ang pagbugal-bugal sa Dios inay palabtik kini ngadto sa iyang mga kritiko nga walay laing gibuhat mao ang pagpamantay sa tanan nga lakang niyang ginahimo.
Wala na tubaga ni Abellera ang pangutana kun nakalapas ba sa maayong pamatasan si Pres. Duterte sa iyang mga banat niini sa mga obispo sa Simbahang Katoliko apan gibarugan sa konsehal nga pagsabot lang ngadto sa presidente ug walay laing tumong.
Gidapit na lang sa konsehal ang publiko nga dili seryosohon ang mga istorya ni Pres. Rodrigo inay sabton na lang kini kay ingon ani man gyod ang kinaiya sa pangulo nga mubuhi og sakit nga mga pulong.
RadyoMaN Joel Viray
