Jamindan, Capiz – Panawagan subong sang pamunoan sang 3rd Infantry Division sang Philippine Army sa Camp Macario Peralta ang hustisya sa kamatayon sang ‘gin-abduct kag ginluthang’ nga si Corporal Frederick Villasis sa Barangay Lahug, Tapaz, Capiz.
Suno kay 3ID Commander Major General Eric Venoya, ang amo nga pag-atake ang nagapamatuod lamang sang ‘pagka-human rights violator’ sang nasambitan nga Communist Terrorist Group.
Una diri, nangin makahas man ang ginbuy-an nga tinaga ni Major Cenon Pancito III, spokesperson sang 3rd Infantry Division sang Philippine Army angut sa natabo nga kalakasan kun sa diin ginbangga-an, gingapos kag ginluthang si Corporal Villasis samtang ginsunog pa ang ginsakyan sini nga motorsiklo.
Gintawag pa ni Pancito ang mga myembro sang NPA nga ‘Hudas ng Bayan’ bangud sa ila nga ginhimo sa tropa sang gobyerno.
Sa madumdoman, pasado alas 10 sang aga kahapon sang naghalin sa ila detachment sa Barangay Lahug, Tapaz si Villasis upod sanday Barangay Kagawad Analyn Giganto kag membro sang CAFGU pakadto kuntani sa munisipyo sang Tapaz sang ginbanggaan ang mga ini sang armado nga mga kalalakinhan.
Gingapos sang mga ini sa likod ang katapo sang militar kag ginluthang.
Nahibaluan nga si Corporal Frederick Villasis ang kabahin sang Community Support Program Team(CSPT) sang Philippine Army nga gin-assign sa Barangay Lahug, Tapaz, Capiz.
