Roxas City, Capiz – Ginkumpirmar ni Jail Chief Inspector Abner Zamora sang Roxas City BJMP nga na-transfer na sa ila kustodiya ang mga suspek nga sanday Joel Domayan kag Forex Investment Scam Queen Lourdes Baarde.
Nahibaluan nga sanday Baarde kag Domayan ang nagapangatubang sang patong-patong nga mga kaso sang estafa kag syndicated estafa.
Samtang padayon pa nga atlarge ang iban nga mga kaupdanan sang mga ini.
Ginpasalig naman sang jail warden nga may yara sang supesiyente nga pwersa ang BJMP para sa seguridad nanday Domayan kag Baarde.
Aminado si Zamora nga may yara sang pamahog sa kabuhi sang duha ka mga akusado kabangdanan nga nagplastar sila sang security measures para sa mga ini.
Suno pa kay Zamora, tanan nga magbisita ang kinahanglan nga kuhaan anay sang pangalan.
Samtang ginpasalig man sini sa pamilya nanday Baarde kag Domayan subong man sa mga akusado nga tinguhaan sang BJMP nga ma-secure ang mga akusado agud nga kun kinahanglanon na sang korte ang presensya sang mga ini, mapresentar sila tubtob nga matapos ang trial sang kaso.
