Panabo City – Dead on arrival sa hospital ang usa driver sa motor human nadisgrasya sa National Highway, Salvacion, Panabo City alas 11:00 kagahapon sa buntag (Abril 6, 2021) nga gikalambigitan sa motorsiklo ug forward truck.
Sa interbyu sa DXDC RMN Davao kang Police Corporal Bernie Torreon, traffic investigator sa Panabo PNP, giila ang biktima nga si Florante Olamit, 45-anyos, residente sa Purok 7, Barangay Ising, Carmen, Davao del Norte. Samtang ang driver sa forward truck mao si Petronilo Torres, 58-anyos, residente sa Purok Panaghiusa, Maligatong, Baguio District, Davao City.
Saysay ni Torreon, nagsunod ang duha ka sakyanan sa dihang natumba ang motor human niini nabangaan sa likod ang gisundan nga nag bisiktleta rason nga nibangga usab ang nakasunod nga forward truck hinungdan nga naligsan ang biktima.
Depensa usab sa driver sa truck nga 40 km/hour lamang ang dagan niini una nahitabo ang insidente.
“Actually ang ingon sa mga witness didto, nabangaan niya ang bike, nalubot niya ang bike. Natumba silang duha. Pagkahuman niagi ang truck, naligsan siya. Napabor siya atong truck. Kay naistorya nako ang driver sa bike, nalubot siya sa motor, nilupad ang bike,” saysay ni Torreon.
Matud sa investigator, nagbaton sumala pa og settlement ug kasabutan ang duha ka grupo nga i-shoulder kun abagahon na lamang sa tag-iya sa truck ang galastohon sa pagpahilona sa patay’ng lawas sa biktima ug dili na mokaso pa.
Panawagan sa pulis nga kinahanglang magbaton og distansya sa ubang sakyanan ug tumanon ang speed limit sa dalan aron malikayan ang susamang panghitabo.
RadyoMaN Kirby Manzon
