Davao City – Nalikayan ang madugo-on nga buy-bust operation human malinawong mi-uban ang duha ka notado nga tigpayuhot og iligal nga droga sa lugar sa Panacan ning siyudad kagabii.
Nabitbit nga buhi sa kapulisan ang mga suspek nga sila si Amilladin Macabidar alyas Mel Muklo, 36 anyos, ulitawo ug nagpuyo sa Golden Hills Subdivision, ug Robert James Natividad, 20 anyos, tricycle driver ug residente sa Crystal Meadows, Km 11 Sasa ning dakbayan.
Ang duha giposasan sa Sasa PNP human gitunol ni Mel Muklo ang sachet sa shabu sa pulis nga poseur-buyer ug nakuha gikan kaniya ug kang Robert James ang laing mga sachet sa shabu, 500 pesos nga mark money ug cellphone.
Gisulti ni Sasa PNP Chief of Police Chief Inspector Emerson Pugong nga nakadawat kini og impormasyon gikan sa impormante labot sa iligal nga kalihukan sa mga suspetsado sa lugar.
Giingon pa sa impormante nga gitanyag kini og tahas ni alyas Muklo nga mangita og mopalit og shabu apan ang wala damha sa suspek nga gisumbong na diay kini sa kapulisan.
Human gipailawom sa makuti nga pagpanubay ang kalikuhan ni alyas Mel Muklo gilayon gikasa ang buy-bust operation sa Corner San Miguel, Panacan ning dakbayan alas 7:30 kagabii.
Diriyot na-uktaba ang pagsakuti sa mga suspek human gibalhin ni alyas Mel Muklo ang transaction sa may corner Ubalde R. Castillo diin hingpit natigayon ang pagdakop sa duha alas 11:00 kagabii.
Gihikay na karon sa Sasa PNP ang tukmang kaso sa duha subay sa kalapasan sa section 5 ug 11 sa RA 9165 kun Comprehensive Dangerous Drugs Act of 2002.
RadyoMaN Joel Viray
