Dipolog City – Pabilin giobserbahan ang kahimtang sa usa ka panadero sulod sa probinsiyal hospital human nakuryentehan niadtong adlaw’ng sabado alas 5:40 sa hapon sa may Dipolog Center Mall, Rizal Ave. Barangay Central ning dakbayan sa Dipolog.
Ang biktima naila nga si Mark Anthony Elloren, 20 anyos, ulitawo ug assistant baker sa Bread & Rolls Bakeshop og lumad nga taga Purok Sabinet, Brgy. Matam, sakop kini sa lungsod sa Katipunan ning lalawigan sa Zamboanga del Norte.
Subay sa gihimong imbistigasyon ni PO1 Nelvin Mangan, imbistigador sa Dipolog PNP nasayran nga kining biktima human nakaluto ug pan, nagkuha’g hagdanan dayun saka sa ibabaw nga bahin diin atua didto nahimotang ang main electrical switch nga gituhoan matud pa aron didto maglantaw lantaw sa mga palibot.
Wa damha sa biktima nga nisangko, ang iyang ulo sa live wire nga maayong pagkapulak niini ngadto sa sementadong salog.
Ang kauban nga si Ronald Cagbabanua maoy nay nakamatikod sa nahiagoman sa biktima kinsa daling nangayo tabang og ilang gidala sa Zamboanga del Norte Medical Center.
Sa karon tulala pa ang biktima human napaso iyang ulo ug gipamati ang pagkapantok sa semento.
