Davao City – Dili na bag-o sa siyudad sa Dabaw ang terorismo kay makapila na giatake sa mga terorista ang dakbayan sa miagi nga mga panahon ug gani ang katapusan ang Night Market Bombing sa Roxas kaniadtong 2016.
Sumala ni Department of Interior and Local Government 11 (DILG-XI) Director Alex Roldan, walay maayong laki makalikay sa terorismo kay ang Amerika nga abante na ug moderno ang kagamitan malutsan paman gani og mga terorista.
Apan bisan pa og makapila na miatake ang mga terorista sa siyudad wala gyod gihapon matay-og ang seguridad ug makatooran ani mao ang pagsutoy sa ekonomiya sa dakbayan karon.
Gibatbat ni Roldan, ang pagsumpo sa terorismo wala kini sa kung unsang matang sa istratihiya gamiton sa mga otoridad apan nagdepende kini sa kooperasyon sa publiko ngadto kanila.
Dako og ikatampo ang katawhan sa pagsanta sa terorismo ug pakigbatok sa mga terorista pinaagi sa pagpaabot og impormasyon ngadto sa kapulisan ugali dunay kadudahang tawo sa ilang barangay.
Apan kun walay pagpakabana ang publiko sa mga tawo sa palibot bisan og adunay nakasud nga terorista sa ilang dapit makawang gihapon ang hugot nga seguridad ug paningkamot sa atong kapulisan.
Sa tan-aw sa opisyal, pakyas ang mga terorista sa ilang tumong tungod sa matag molusad sila og pangatake mas nagkalig-on ang panaghiusa sa mga Dabawenyo aron isog tindugan ug harongan ang mga dautang tawo nga buot musabwag og kasamok sa atong siyudad.
RadyoMaN Joel Viray
