Davao City – Dako og ikatabang ang panaghiusa sa 25 ka mayors aron magpabilin nga malinawon ang tibuok dapit sa rehiyon onse.
Kini ang gipasabot ni Task Force Davao Commander Col. Nolasco Mempin isip pagsabwag sa dakong hagit ngadto sa matag mayor sa pagmintar sa hapsay ug kalinaw sa rehiyon onse.
Segun ni Mempin nga angay masabtan sa mga local chief executive ang importansiya sa kalinaw kay mao kini ang dalan paingon sa kauswagan sa ekonomiya ug kalamboan sa tibuok dapit sa kasadpang Mindanao.
Una nang gisulti ni Comval Province Governor Tyron Uy nga dakong problema sa ilang probinsiya ang insurhensiya busa mapasalamaton ang opisyal sa presensiya sa militar sa nagkadaiyang probinsiya alang sa hapsay ug kalinaw.
Natuki ang maong hisgutanan atol sa gilusad nga panagpulong nga gipasiugdahan sa DILG ug DND nga gitambungan sa 25 ka mayors, Armadong Kusog sa Pilipinas ug nasudnong kapulisan nga gipahigayon sa usa ka hotel dinhi sa dakbayan.
RadyoMaN Joel Viray
