Marso 11, 2020 sa dihang gideklara sa World Health Organization (WHO) ang Coronavirus Disease 2019 (COVID-19) nga usa ka global pandemic. 2021 ang ikaduhang tuig sa pandemya diin mihatag usab og kahadlok sa katawhan ang managlahing COVID-19 variants nga na-detect ug nakasulod sa Pilipinas.
Matud ni Dr. Ricardo Audan, Office in Charge (OIC) sa Southern Philippines Medical Center (SPMC), susamang health protocols nga ginapatuman ang sundon sa publiko aron kalikayan ang unsa mang variants sa COVID-19 nga posibleng muabot.
“Diba naa nay Alpha, Beta, Delta, Lambda, then Omicron, naga-mutate ang virus. Ma-different kind of variants is still a COVID-19. Among ginasulti nga bisan og fully vaccinated ka, you still have to wear face mask. Mag-social distancing gihapon. Very importante ang handwashing. It’s the same protocols that we have to follow to avoid in case naa may mutants o variants sa mga COVID-19. These are the ways na pwede ‘ta maprotektahan,” saysay ni Audan.
Marso 2021 usab sa dihang niabot ug nasugdan ang rollout sa COVID-19 vaccines sa Pilipinas ug nagapadayon ning kasamtangan. Pipila sa mga bakuna nga niabot sa nasud ug nahatagan og emergency use authorizations (EUA) sa Food and Drug Administration (FDA) mao ang Pfizer–BioNTech, Oxford–AstraZeneca, Sinovac, Sputnik V, Janssen, Covaxin, Moderna, Sinopharm BIBP, Sputnik Light ug Novavax.
Gikalipay usab sa health official nga aduna nay mga kumpanya ang nagmugna ug padayong nagproseso og medisina batok COVID-19 aron hinay-hinay na nga mabalik sa normal ang sitwasyon tungod sa pandemya.
“That’s a very positive and ginasulti (nga) pag-asa nato kay kailangan man nato tambal nga against COVID virus. So, very hopeful siya, very promising drugs siya. Hinaut unta nga makaabot na sa Pilipinas,” sulti ni Audan.
Sa atong pagsugat sa Bag-ong Tuig, 2022, ato pang hugtan ang atong pagtuo sa Ginoo nga maoy ‘in control’ sa tanang butang.
Bisan sa padayong pademya nga atong giatubang, ug bisan sa uban pang hagit ug problema nga muabot sa unahan, hinumdumi nga kini dili magdugay ug kini temporaryo lamang.
RadyoMaN Kirby Manzon
