Nagtupa na ang ginpangako nga bulig ni Agriculture Secretary Manny Piñol para sa mga mangunguma sa isla sang Panay tatlo ka bulan na ang nakaligad sang ginbisita sini ang banwa sang Miagao, Iloilo kag probinsya sang Antique.
Sang biyernes nga adlaw, ginturn-over ni Secretary Piñol ang 50 milyones pesos nga pautang para sa mga mangunguma sang ahos kag bombay sang Miagao kag probinsya sang Antique pinaagi sa production loan easy access ukon PLEA.
Aa 50 milyones pesos nga pondo, 20 milyones pesos ang gin -aman para sa mga mangunguma sang Miagao kag 30 milyones pesos naman para sa probinsya sang Antique.
Suno kay Secretary Piñol, target sang ahensya nga mag-uswag ang pagpangabuhi sang mga mangunguma sa bug-os nga Pilipinas kag ang pagpautang sa manubo nga interes ang isa sa mga solusyon.
Sa kantidad nga hulamon sang mga mangunguma, 7 porsyento ang interes kada tuig.
Ginalauman nga linibo ka mga mangunguma ang makabenepisyo sa programa sang ahensya kag nagpanugyan si Piñol nga dapat amligan sang mga benepisyaryo ang kwarta nga ginpahulam sang gobyerno.
Kag agud masiguro nga sa nagakaigo nga tawo matupa ang proyekto may project management officers nga magamonitor sang programa.
