Igapa-suspender ni Presidente Rodrigo Duterte sa Land Transportation Office ang pagpatuman sang doble plaka sa mga motorsiklo.
Ini ang ginhatagan pagtamod ni Presidente Duterte sa iya pagpamulong-pulong sa 25th National Convention sang National Federation of the Motorcycle clubs of the Philippines ukon NFMCP sa Iloilo Convention Center sini lamang nga gab-i (Abril 6).
Suno sa Presidente nga nahibaluan niya nga ginapamatukan sang mga motorcycle riders ang nasambit nga kasuguan kabangdanan nga iya man istoryahon si Senador Richard Gordon natuhoy diri.
Ginpaathag ni Duterte nga bisan sa iban nga pungsod, wala man sang plaka sa atubang sang motorsiklo bangud tuman sini ka delikado kag mahimo makahalit pa sa motorista kon madisgrasya.
Suno sa iya nga okey na nga sa likod ang plaka basta padakuan lamang agud makita sang maathag ang letra kag numero kon magamit sa krimen ang motorsiklo.
Magluwas diri, ginpahayag ni Presidente Duterte nga tuman ka daku sang 50 mil pesos nga multa sa madakpan nga wala sang plaka ang motorsiklo.
Suno sa iya nga iduso niya nga himuon na lamang nga 10 mil ukon 15 mil pesos ang multa sa violation sang nasambit nga kasuguan.
