Panimalay sa magtiayong senior citizen gilungkab, kapin 130mil pesos nadala sa mga kawatan

Pagadian City – Mokabat sa 133mil pesos ang gibana-banang kantidad sa mga alahas nga nadala sa mga kawatan human nahitabo ang pagpanglungkab didto sa Purok Papaya, Barangay Lumbia, Pagadian City. Ala 7 sa gabie kaniadtong Sabado dihang nakadawat ug report ang Pagadian PNP kon diin ang usa sa biktima ang usa ka senior citizen nga nailang si Letecia Toledo Caldeo, 62 anyos.
Sa imbestigasyon nasayran nga ang biktimang magtiayon ang milakaw ug miadto sa Barangay Lenienza, ning syudad arun sa pagtambong sa birthday party sa ilang apo. Pag-uli sa mga biktimang senior citizen, nahikurat na lamang kini dihang nakita ang sliding glass window sa ilang balay nga naabli na.
Pagtan aw sa drawer sa ilang lamesa nakita ang pinugos nga pag abli ug pagguba niini. Nadala sa wala mailhing mga kawatan ang mga alahas sa maong sudlanan. Padayon pa nga giimbestigahan sa kapulisan ang mga responsable sa naasoyng pagpangawat.