iFM Laoag – Nagatendar ni Gob. Matthew Marcos Manotoc iti pannakalukat ti “Uni Games” ti Mariano Marcos State University wenno MMSU ita a malem, Nobiembre kuatro.
Impeksa ti gobernador ti ragsakna iti pannakaawisna nga agatendar iti nadakamat nga aktibidad ti unibersidad.
Binigbigna ti panangseryoso dagiti agad-adal iti nasao nga aktibidad babaen iti panangisaganada ti inusarda a “costume” ken “cheers” dagitoy.
Mangnamnama ti gobernador a maliwliwa ti tunggal maysa bayat ti panagannayas ti pay-ayam ken agbalin a nabunga saan laeng a para kadagiti atleta ngem para iti intero nga MMSU.
Dakkel ti pammatina a babaen iti maiyuswat a “uni games” ket marikna dagiti amin a kameng iti MMSU community ti panagkaykaysa.
Ginutigotna dagitoy a mang-enjoy iti panaglalabanda ken masapul a laglagipenda nga iti kamaudianan ket dagitoy to met laeng ti agkakadua.
Maipalagip a ti Uni Games ket paglalabanan dagiti sangapulo ket maysa a campus ti MMSU ken ti nagkampeon iti kallabes a Uni Games ket ti College of Engineering.
