Dipolog City-Pormal na nga gibuksan ang bag-ong Passenger Terminal sa miaging adlaw Enero 23, 2019 didto sa may Galas Port, Dipolog City.
Taod-taod na nga nag operate ang maong pantalan dinhi sa Dipolog pero wala pa kini Passenger Terminal tungod usab sa padayon nga pagpanday niini sa maong pantalan.
Gani daghan ang mga nagreklamo nga mga pasahero kung nganong walay terminal nga pwede istambayan sa mga pasahero pero niadtong Myerkules gihimo ang ribbon cutting ceremony sa Passenger Terminal uban ni Mayor Darel Uy ug uban pang mga opisyales sa probinsya ug sa barangay opisyal sa brgy. Galas ning dakbayan.
Ang maong edispisyo nagkantidad kini ug 21 milyones ka pesos
Ang maong pantalan adunay byahe gikan dinhi sa Dipolog padulong sa dakbayan sa Dumaguete, Bohol, ug Cebu matag adlaw.
Usa ka RoRo vessel nga iya sa kompanyang Medallion Shipping ang nag operate sa maong pantalan ug lauman pa matod sa lokal nga panggamhanan dinhi sa Dipolog nga aduna pa’y laing kompanya sa RoRo ang mo byahe kun maaprobahan ang sertipiko sa MARINA.
Hinuon dili lang ang Dipolog ang adunay pantalan kun dili anaa usab sa igsuon niini nga syudad didto sa may Dapitan City kun asa dugay na mga katuigan ang mga pantalan sa may Polauan, Dapitan.
Lauman nga dili na maghuot ang mga pasahero mga mo byahe sa lagyong lugar tungod kay duha na kabuok ang pantalan sa Probinsya sa Zamboanga Del Norte.
