Davao City – Alang kanako, walay dautan sa intensyon kun motibasyon sa gobyerno nga tabangan ang mga pobre sama nato pinaagi sa 4Ps. Dalaygon kaayo kini nga tumong ug gani pasalamat ‘ta bisan sa kanhi-ay’ng mga rehimen gumikan ning maong direct financial intervention.
Apan kitang tanan nasayud nga daghang buslot ang maong programa nga kun atong ayuhon, mas daghan pa unya ang undanong makabenepisyo.
Kun atong tangtangon ang mga mini kun bogus nga mga beneficiaries ug i-apil nato ang uban pa nga wala pa makatilaw ilabi na kadtong gikonsidera nga ‘poorest of the poor’ kun kadtong mga wa-ay wa-ay gyud, makatabang pa ta’g maayo ngadto sa atong mga isig-kaingon.
Apan sa ngadto-ngadto angay natong ma-realisar nga mas maayong atong tudloan ug pagpangisda ang usaka kabus ug timawa inay nga direktang tunolan na lamang sa hinabang nga walay kalahian sa limos – pasayloa ko sa terminolohiya.
Ako dakung uyon sa ideya nga dili abolisahon ang kontrobersyal nga programa apan atong i-redirect ngadto sa livelihood programs susama sa mga ‘food-for-work’ programs kay ang tawo man gud mas maka-appreciate kun ang atong pagadawaton atong gihagoan kun atong gipasingotan – imbes nga dawlims ra ‘ta nga igo na lamang ‘tang modawat nga wala gani nato gipaningkamotan ug taman.
Husto ba ko sa akong gibarugan?
RadyoMaN June Duterte
