Sa interbyu sa DXDC RMN Davao kang Delfin Tagalog, Responder sa Municipal Disaster Risk Reduction and Management Office (MDRRMO) Pantukan, giila ang mga biktima nga sila Gilbert Atop, 42 anyos ug Crisanto Canopin, 47 anyos, pulos residente sa Mati City, Davao Oriental.
Gibutyag ni Tagalog, narekober ang patay’ng lawas ni Atop alas 8:30 kagahapon sa buntag (Marso 9, 2022) ug alas 2:30 sa hapon usab sa susamang adlaw si Canopin.
Walay undang ang gihimong retrieval operations alang sa duha pa ka minero nga anaa pa sa sulod nga giilang sila El Canopin ug Dodoy Calipe.
Matud sa responder, aduna usay mga nadamyos nga balay duol sa lugar kung asa midahili ang yuta apan walay samaran nga residente gawas lang sa mga biktimang minero.
“Wala ‘tay mga natala nga mga tao sa balay nga naapektuhan. Kadto lang gyud nga area. Kadtong mga tao nga natabunan, kadtong nanulod (sa tunnel). Kadto lang nga area,” butyag ni Tagalog.
Ang paghumok sa yuta resulta sa sige og ulan sa probinsya ang hinungdan sa landslide, rason nga padayon usab ang pagpahimangno sa awtoridad sa katawhan nga kanunay nga mag-amping ug mag-igmat.
RadyoMaN Kirby Manzon
