Madalag, Aklan — Patay ag haeos nga maeantas rong liog it panugangan matapos nga eab-on ko anang umagad Sabado it agahon sa Brgy. Dit-ana, Madalag, Aklan.
Ro biktima nakilaea kay Dionie Celino y Sario, 51-anyo samtang rong suspek nakilaea kay Jernel Narce y Nama, 34-anyos tanan residente it Brgy. Medina sa nasambit nga banwa.
Suno kay SPO2 Abdon De Mateo it Madalag PNP ag imbestigador sa nasambit nga kaso nga kahapon hay nakabaton sanda it impormasyon halin kay Punong Barangay Liliosa Billones it Brgy. Medina nga may natabong pagpangeabo sa Brgy. Dit-ana ag rong suspek hay nagsurrender kay Kagawad Rosanel Ventura daea ro espading nga anang gingamit.
Insigida nga nag responde rong kapulisan sa lugar sa pagpanguna ni SPO1 Ulysses Nidua para i verify ro nasambit nga report.
Sa imbestigasyon naga guwa nga rong suspek hay idto sa natabuan it insidente nagahakot ko anang mga ginpangahoy ag umabot man ro biktima para bisitahon ro anang mga tanum nga kahoy ag mag pangahoy man ag posible may natabong argumento sa tunga ko daywa parte sa andang dating uwa pag intindihanan.
Nasayuran nga rayang suspek hay bueag sa anang asawa nga unga it biktima bangud man sa bukon it manami nandang relasyon ko pamilya it baye.
Samtang sa eklusibong pakikipag angot it RMN News Team sa suspek nga suno kana haeabo na ro anang panugangan bangud nga gin abangan imaw sa daean ag in unahan it pag eabo pero uwa imaw maigo ag ginpanan aw na nga matsa perdi imaw hay ana eon lang nga linabo.
Ro biktima nakaangkon it patal nga tama it pag eabo sa waea nga liog paadto sa tangkugo samtang rong suspek hay kulong sa lock up cell it Madalag PNP ag nakataeana nga iga inquest makaron nga adlaw.
