Inaprubahan na ng House Committee on Welfare of Children ang substitute bill o panukalang “An Act Ensuring Child Support and Penalizing Parental Refusal or Neglect Thereof.”
Ang naturang substitute bill ay pangunahing iniakda ni House Deputy Majority Leader Erwin Tulfo at mga kasamang niyang ACT-CIS Party-list Reps. Edvic Yap at Jocelyn Tulfo, gayundin sina Benguet Rep. Eric Yap at Quezon City 2nd District Rep. Ralph Wendel Tulfo.
Ayon kay Congressman Erwin Tulfo, nakapaloob sa panukala ang anim na buwan hanggang anim na taong pagkulong sa mga ‘deadbeat’ father na mabibigong magbigay ng paternal child support kahit may trabaho o pinagkakakitaan ito.
Kapag naisabatas ang panukala, ang Department of Social Welfare and Development (DSWD) ang mangangasiwa ng programa.
Dagdag pa ni Tulfo, makakatulong ang panukala sa halos 15 milyong solo parents lalo na sa mga ina, para hindi na nila kailanganin na magmakaawa sa ama ng kanilang anak na magbigay ng sustento.
Sabi naman ni Congressman Yap, layunin ng panukala na matiyak na magagampanan ng mga ama ang kanilang obligasyong pinansyal sa kanilang mga anak.
