Nakatawid na sa ikalawang pagbasa sa Kamara ang House Bill 6452 o panukalang pagtatatag ng “Virology and Vaccine Institute of the Philippines” o VIP sa ilalim ng Department of Science and Technology (DOST).
Pangunahing mandato nito ang pagsasagawa ng research o pananaliksik kaugnay sa mga virus at viral diseases sa mga tao, halaman at mga hayop gayundin ang paglikha ng mga bakuna at gamot.
Bahagi rin ng trabaho ng VIP ang pagpapatupad ng mga polisiya, plano, programa at mga proyekto para sa pagpapahusay ng virology science and technology sa bansa.
Ito ay para maprotektahan ang mamamayang Pilipino at maging handa ang Pilipinas sa public health emergencies tulad ng pandemya.
Ang VIP bill ay isa sa priority measures na isinulong ni Pangulong Ferdinand “Bongbong” Marcos Jr., sa kaniyang unang State of the Nation Address.
