iFM Laoag – Mangiwayat ti Department of Agrarian Reform – Ilocos Norte ti eleksion para kadagiti agbalin a pannakabagi ti Provincial Agrarian Reform Committee wenno PARCCOM inton Agosto 16.
Ti PARCCOM ket bukbuklen dagiti representatives manipud iti naduma-duma a sector a mangmonitor no husto ken nasayaat met laeng ti pannaka-implementar dagiti proyekto ti DAR iti probinsya.
Karaman kadagiti mapili iti nasao nga eleksion ket dagiti agserbinto a pannakabagi ti Farmers’ Organizations, Agricultural Cooperatives, Non-Government Representative, Landowners Representatives, Farm Workers Representative, Agrarian Reform Beneficiaries Representatives ken Cultural Community Representative.
Agarup sangapulo ket tallo a representative ti mapilinto iti nasao nga aktibidad. Isudanto ti kabadang ti DAR a mangiburay ti ad-adu pay a serbisio kadagiti beneficiaries ti Comprehensive Agrarian Reform Program wenno CARP.
Dagiti mangayat nga agbalin a pannakabagi ti PARCCOM ket masapul a mangipila ti aplikasion iti opisina ti DAR Ilocos Norte saan a naladladaw ngem Agosto 2.
Bernard Ver, RMN News
