Davao City – Ang kawalay ngipon sa balaud ug pagkamapasagaron sa mga ginikanan makonsidera karon nga ugat-hinungdan sa pagdaghan sa mga batan-ong babaye nga luyo sa linghud pa kaayo nga pangedaron mitilaw na sila og pakighilawas maong sayo usab sila naburos.
Sumala ni Barangay Lapu-Lapu Agdao Sangguniang Kabataan (SK) Chairman Paulo Dominic Rodriguez nga ang kawalay ngipon sa atong mga balaud sama sa curfew enforcement malantaw usab nga dakung rason sa pagsaka sa mga insidenteng batan-ong babaye nga sayo nabuntisan.
Segun ni Rodriguez nga kung istrikto lamang unta nga gipatuman ang mga balaud sama sa curfew, wala unta’y mga batan-on nga maglatagaw panahon sa kagabhi-on.
Ang kapabayaan sa mga ginikanan sa ilang mga responsibilidad sa paggiya ug pagmatuto og maayo usa usab sa dakung factor nga nakaingon sa sayo nga pagbuntis sa ilang mga anak.
Matud ni Rodriguez, makaalarma na ang padayon nga pagsaka sa kaso sa early pregnancy sa tibuok nasud diin sagad nalambigit sa sexual intercourse ug naburosan nag-edad og 15 anyos hangtud 19 anyos.
Sa tibuok nasud, usa ang Region XI partikular ang dakbayan sa Davao ang dunay pinakataas nga ihap sa early pregnancy incidence tungod sa ginatan-aw nga sex scandals sa internet ug bisan na ang mga ‘sexually-orientated’ teleseryes sa primetime television.
Aron dili maengganyo sa law-ay nga buhat ug sa early pregnancy, nagpanday og programa ang SK kansang tumong mao ang pagpahalikay sa mga batan-ong babaye gikan sa maka ala-ot nga hinimoan, panapos nga pamahayag ni Rodriguez.
RadyoMaN Joel Viray
