Davao City – Gipahinumduman ni Davao City Second District Councilor April Marie Dayap ang mga ginikanan sa ilang obligasyon ug responsibilidad sa pag-umol sa maayong pamatasan sa ilang mga anak.
Sumala ni Dayap nga anaa sa kamot sa mga ginikanan ang pagtudlo og maayong kinaiya sama sa kulturang pagka-matinud-anon nga pamatasan kung asa nailhan ang mga Pilipino sa tibuok kalibutan.
Segun ni Dayap, dili angay mapapas sa presenteng henerasyon ang kultura sa pagkamatinud-anon sa mas edaran ug pagrespetar sa balaud kay mao man kini ang gitudlo sa mga katigulangan.
Apan subo lamang palandungon tungod kay dili malilong ang kamatuoran nga ang mga ginikinanan napakyas sa pagpasa sa kulturang pagkamatinahuron ngadto sa ilang mga anak karon.
Gawas sa pagpasagad sa mga ginikanan, gibasol ni Dayap ang mga television shows tungod sa ngil-ad ug law-ay’ng mga salida ug dugang pa ang social media nga nagpamaut sa batasan sa mga batan-on karon.
Busa kun itandi sa unang henerasyon ug sa karon nga panahon dayag na kaayo ang dakung kalainan sa natad sa pagkamatinud-anon diin sa bag-ong henerasyon bastos na og tinagdan sa edaran.
Tungod niini, gidasig sa batan-ong magbabalaud sa siyudad ang mga ginikanan nga dili isalikway ang ilang responsibilidad samtang dili pa ulahi ang tanan.
Sa katarungan nga kun mapakyas ang parents sa ilang tahas, hayan maghatag og labad sa ulo sa katilingban ug sa gobyerno ang ilang mga salawayong anak kinsa wala gi-umol sa maayong pamatasan, panapos sa batan-ong konsehala.
RadyoMaN Joel Viray
