Davao City – Tungod sa tumang kabalaka sa mga ginikanan kabahin sa dengvaxia vaccine, nahadlok na usab ang pipila kanila nga pabakuhanan ang ilang mga anak og kontra tipdas.
Kini ang gina atubang nga problema karon sa Brgy. Lubogan Toril, Davao City atol sa interview kang Brgy. Captain Levi Fortuna sa DXDC RMN Davao diin sumala niya, nagpatabang na sa ilaha ang City Health Office kun CHO nga ipasabot sa ilang ginsakpan nga walay angay ikabalaka sa pagpabakuna og kontra tipdas.
“So gina-explain nato sa mga tawo kay daghan nahadlok tungod sa issue sa dengvaxia, nangayo og tabang ang CHO sa mga kapitan nga ipasabot nga dili na siya dengavaxia, anti measles na siya ngadugay na ginagamit, dugay na gina-inject ug walay record nga namatay tungod niana,” sigun ni kapitan Fortuna.
Dugang sa kapitan nga base sa resulta sa CHO, 40% ang nagpabakuna pa hinungdan nga muhimo ang matag Brgy. og rekorida, information dissemination kabahin sa maong bakuna.
Gani karong Pebrero subay sa panagpulong nga gihimo kagahapong adlawa sa CHO, Department of Health ug mga Brgy. Captains, lauman ang dungan nga pagpahigayon og bakuna kontra tipdas aron masiguro nga 100% mapailawum ang kabataan sa measles vaccine.
RadyoMaN Renz Barbarona
