Nakakita na sang solusyon si City Councilor R Leoni Gerochi sang tuigan nga problema sa paggamit sang mga plaza bilang venue sang pista kag agro-industrial fairs.
Suno kay Gerochi ginaplano niya nga iduso ang isa ka ordinansa nga magatukod sang Parks Commission.
Mahimo hatagan sang poder ang Park Commission nga makapangita sang pondo agud maamligan ang plaza.
Ginpaathag ni Gerochi nga indi naman mahimo nga tanan na lang dumilian sa sulod sang plaza.
Mahimo man pahanugotan ang mga mahipid kag indi permanente nga mga food kiosk.
Pahayag ni Gerochi nga mahimo man magamit ang mga parks nga balaligyaan sang mga concessionaires nga indi man permanente kag indi man eye sore kag mahipid man tulokon.
Gintumod sang councilor ang mga plazas kag parks sa iban nga pungsod nga iya nabisitahan.
Ini ang plano ni Gerochi matapos liwat nga nangin kontrobersyal ang Jaro Agro-Industrial and Charity Fair sa kapyestahan ni Nuestra Senora de la Candelaria matapos ginbutang sa dalan ang mga manugbaligya sa baylo nga sa sulod sang plaza.
Kun matukod, ang Parks Commission na ang magadumala kag maga-maintain sang mga plazas, parks kag lakip na ang Iloilo River Esplanade.
(photo from web)
