Davao City – Dako ang pagsalig sa partner ni Barangay 9-A Kapitan Roderico Llubit o Kapitan “Tata Llubit” nga makab-ot ang hustisya ug manubag ang responsable sa pagpatay sa kapitan pasado alas 8:00 sa gabii niadtong Martes (Mayo 25, 2021).
Sa interbyu sa DXDC RMN Davao kang Mary Grace Fuentes, partner sa biktima, gisaysay niini nga walay gitug-an si kapitan Llubit una kini gipatay nga adunay death threat ug gisalig na lamang sa mga awtoridad ang lawom nga inbestigasyon.
“Hulat lang mo. Madakpan lang lagi mo, makuha lang mo. Ma-serve lang gihapon ang hustisya para sa amoang kapitan, para sa akoang partner. Kay naay Ginoo nagtan-aw, naa pod ‘tay hustisya. Naa ‘tay gobyerno. Ma-resolve lang lagi gihapon na siya (ang krimen),” sulti ni Fuentes.
Gisaysay ni Fuentes kung unsa kakugihan si Kapitan Llubit diin nagapangunay kini og resolba sa mga problema sa ilang barangay sama sa insidente sa kawat, iligal nga droga ug uban pa.
Gibutyag usab niya nga mas lambing ang iyang partner sa maong adlaw una namatay rason nga grabe ang pagsubo niini sa gidangatan sa kapitan.
Sa ilang balay sa Purok 10, Muslim Village, Barangay 9-A, Davao City hayaon nga mamahimong mabisita sa publiko.
RadyoMaN Kirby Manzon
